BB 唔肯食奶樽

Kay Jeong您好！

我地好少會以媽媽奶水不足的角度來看，因為絕大部份的婦女都有能力生產足夠的奶水，只有極少數人因腦下垂體有問題影響荷爾蒙分汾，這情況多數在產後就會見到。

要客觀知道BB 有沒有食到足夠的奶，我們會留意大小便次數，簡單而言是觀察output 來估計input，和觀察BB 的增重紀錄。

四至六週的BB 每日換到五至六條夠濕的尿片，有二至五次的便便，那就可以說BB已食到足夠的奶。

你留意下，BB每次食奶係點樣，如果食奶每邊能正正經經食到十至二十分鐘，那就真是因為肚仔餓了，如果只食了五分鐘，然後吸吮放慢下來，再睡著覺，那BB是因為扭瞓覺而非肚餓。當分別得到BB有咩需要，你就會可以輕鬆一點，知道BB食得飽之餘，也有其他需要，再學習處理。

哺乳圍巾，送禮自用皆宜，所有收益撥捐推廣母乳，歡迎選購。

因為諗住 BB 可能係猛長期, 我就一直都埋身餵奶, 冇再攞雪櫃啲冰奶俾佢飲. 我自己亦都冇再泵奶, 一嚟個胸冇谷住的感覺, 二嚟 BB 食得好密費事泵咗出嚟佢唔夠食.
由上星期五 BB 唔肯食奶樽開始到而家已經一星期了~ BB 仲係咁樣不斷索食, 基本上隔 1~2個鐘就要食, 同埋每日至少都有 3~4個鐘馬拉松式係咁追食. 呢2日得清晨 2個鐘同下午 2個鐘會瞓, 其餘時間都係食吓, 恰一陣 (每次唔超過半個鐘) 又痾吓咁.
我想問個猛長期會唔會咁長 ga? 係咪我身體嘅造奶機能一直追唔到 BB 嘅需求, 所以佢一路都係咁食唔停呢?
另外咁細個 BB ( 而家 5星期大喇!) 每日瞓得咁少有冇問題呢?

足月出世的BB 很少會有營養不良的情況，有研究發現，中度營養不良媽媽生產的奶水，都能提供足夠營養應付BB 需要，所以只要媽媽素來健康，唔係嚴重營養不良的話，都唔需要擔心營養問題。而且母乳優勝之處在於能幫助BB 抵抗疾病的抗體，是奶粉沒法提供的。

至於BB 作息時間，初生BB 的腦部發展未成熟，需要讓腦部間歇地休息。年紀愈小，小睡的次數愈多及小睡的時間愈長。

6個星期至3個月大的BB 通常在睡醒後兩小時內就會感到疲倦。BB 會在大約6個星期大時開始意識到外界的存在，會以笑容回應你，亦開始能分辨日夜。此時BB 會漸漸拉長睡覺的時間，作息也漸漸定時。

真係好彩之前有個朋友介紹咗呢個網俾我, 喺呢度除咗得到啲有用嘅資料同分享到大家嘅餵奶經驗之外, 又可以抒發吓我自己嘅情緒. 因為我實在好緊張, 成日都驚自己餵得唔好影響咗 BB 成長. 屋企其他人都冇餵人奶的經驗, 之前就話我胸咁細, BB 會唔夠飽; 之後就話我咁瘦, 啲奶可能唔夠營養不如補奶粉.
Teresa, 你奶奶同媽咪所講嘅嘢, 我老公都有咁講呀~ 不過你都講得啱, 佢哋都係擔心我哋餵奶太辛苦, 同埋佢哋自己都想餵 BB! 每當 BB 食飽, 好多時都會笑住咁瞓, 一見到 BB 笑我就覺得好滿足了~
昨晚開始 BB 瞓得好咗, 食完一餐可以瞓 3個幾鐘. 但係今朝起身佢又食得密咗, 有時食完又唔瞓... 我以為佢開始大個唔想瞓咁多, 於是試吓撩佢玩, 點知 BB 發晒火 咁我唯有 "暗" 佢瞓啦~ 但佢都唔係好好瞓, 全日都係瞓吓醒吓食吓痾吓咁... ( 希望佢今晚會好瞓啲啦~)
我想問呢, BB 大約要幾個月大先會有較為定時的休息同開餐時間? 另外, 若果 BB 唔瞓可以同佢玩啲乜?

Kay Jeong您好！

我常說，BB 不喜歡奶樽，是BB愛媽咪的表現。

BB出世一直吸吮媽媽溫暖有彈性的乳房食奶，突然間要用有橡膠味又硬的奶樽食奶，聰明的BB當然會知道分別，拒絕吃奶樽是正常的表現啊！

夜間餵奶貼士：
把嬰兒床放近媽媽身邊；
相比吃奶瓶，吃母乳通常吞少些空氣，所以吃人奶後未必需要掃風。

BB 放屁證明腸道在蠕動，是正常表現呢，因為吃母乳，媽媽的乳房會塞滿BB的口，所以較少吞風落肚，就算有，靠放屁已可排出體外。

你唔好唔開心啦，你老公講嘅野係啱嘅，但選唔選擇咁做，就係你嘅決定，因為辛苦果個係你，但得益果個，係你同你BB
我果陣餵人奶，全家上下都反對，幸好得老公支持。。。但都唔比你輕鬆架，奶奶媽咪日日話咩泵出嚟啦，我泵。。。又話下？半粒鐘先泵咁少呀？點夠食呀 佢地唔明白泵係少過埋身餵。。。好喇，到我堅持埋身餵，又左一句右一句話咩大細都無得抖呀，BB要啜成粒鐘無得瞓呀好陰功呀，你坐月坐得好辛苦呀補埋身都唔夠BB食呀咁
但我想講，我後來發現。。。佢地其實好恨用奶樽囉，你知點解嘛？因為佢地都想分享餵BB嘅喜悅。。。你老公都可能係咁，加上佢肉痛你辛苦，所以先諗住對自己骨肉咁殘忍（你諗下你個BB喊到拆天，你有噴奶反射，但都唔埋身餵，嘩，唔係好陰公，係無陰公呀 ）
所以你好好解釋俾你老公聽，餵人奶對你同BB嘅好處（叫佢上呢度睇下啦）佢其實可以幫輕你架，佢可以幫手換片，可以幫手掃風（人奶B都應該掃風的，有時BB掃掃下都瞓架 ）
我聽過健康院姑娘講，滿左月嘅BB夠大，晚上可以唔駛掃風都會自己UR番D氣出嚟，但我瞓喺度餵好怕佢濁親，所以我會餵到一半（比如要換另一邊時）就掃左風先，若果要大便或者UR甚至放屁佢都會呢個時間發生。之後再俾佢飲到瞓。瞓着哂咯，咪睇下佢口有無奶渣囉，有時最怕就係BB含住奶或者UR左奶未吐出嚟，咁就濁親啫。小心注意就OK架喇。
人奶B係勁放屁架！！！！！ 我個女而家七個月食固體都係咁架。。。好好笑。。。因為人奶消化得好快，佢地腸動時，就會放屁架喇！好得意架！但更多時係濕屁，激死呀，要換片囉之後又。。。但人奶B又比奶粉B易UR氣架，所以掃風唔駛掃咁耐的。有時佢飲完奶，俾佢瞓多陣，一抬起頭身，已經UR左架喇。若果你怕晚黑餵佢瞓會責親佢，你較鬧鐘啦（細聲少少或者震機），半小時一響。。。CHECK下BB仲食唔食，若果瞓得着咪抱佢落BB牀囉
比心機呀！

teresa

我老公因為餵唔到奶樽不斷話要轉食奶粉, 話如果我點都唔埋身餵 BB, 咁 BB 一定被迫要食奶樽喎 (真係幻想吓都覺得好陰公). 佢仲話我因為想人奶, 所以堅持唔俾 BB 食奶咀. 如果轉晒食奶粉, 咁 BB 扭計就可以俾個奶咀佢啜, 唔使氹得咁辛苦!
因為呢幾日真係好攰, 加上老公唔多支持, 攪到我都有啲頹喪... 不過多謝大家回覆 令我覺得有返啲 support!
側臥餵奶的確舒服好多, 起碼對手可以抖抖! 不過我淨係日間試過咋~ 因為夜晚自己都好想瞓, 餵餵吓自己都會恰著咗... 若果咁樣餵完唔掃風得唔得 ga? 同埋 BB 成日放屁 會唔會係我掃風佢未 er 晒出嚟?

Kay Jeong您好！

留意有時食一陣就瞓著的BB，好可能會是因為扭眼瞓而喊，不是因為肚餓。

有些時候BB 需要吸吮，是因為吸吮能滿足心理安慰，有安全感就會輕易入睡。

BB 已有四週大，可以試下瞓住餵，你便可以爭取時間休息，見側卧式：

1. 媽媽及嬰兒均側卧於床上，媽媽的頭部要有合適的承托。
2. 用手托著嬰兒的頭及頸之間的位置，以易於控制嬰兒的整個身體。
3. 嬰兒也是側卧並應該與你是腹對腹，同樣地待嬰兒嘴巴張大時，才將嬰兒的頭放上乳房，而不是將乳頭放入嬰兒的嘴內。
4. 媽媽的另一隻手可放在舒服位置。
5. 媽媽兩腿之間及背部可放置枕頭支持腹部肌肉。

我B女都係咁架，我仲以為自己有問題，宜家習慣左就冇事喇.佢好多時都係一個鐘食一次，今朝覺得乳房麻痺添呀，乳頭都係吸得多，掂一掂都痛. 宜家買左個膠既保護盾. 兩隻手腕都好似網球肘，好痛… 掃風唔係次次都 er 架，有時我見佢想訓，會唔掃風添呀，不過頭仔側埋一邊安全d

多謝你分享經驗, 我會努力餵奶... 不過真係好辛苦!
呢幾日 BB 最長瞓唔夠 2個鐘, 係咁食, 啜到個乳頭有啲痛! 加上有時佢真係食得好密 (大約半個鐘/九個字又要再食), 我諗真係得少少奶, 佢食一陣就開始扯乳頭, 更加痛
除咗乳頭, 對手一樣酸痛! BB 一日食咁多餐, 淨係掃風都抱都手軟! 手指公下面好似抽筋咁呀~
我仲想問呢, 掃風係咪次次都會 eur 呢? 有時 BB 食完, 我一抱佢坐直啲就即刻攪掂; 但有時呢, 抱住佢掃足半個鐘都冇聲氣啊~

可能你BB似我個女果陣，一滿月就猛長期，係咁啜，俾佢啜多三五日啦，又會突然夠番奶架喇！
BB猛長期係指每隔一段時間，可能係每三個月或者三星期，BB無端端食多好多奶，媽媽身體要調節，所以BB會啜多D俾媽媽大腦適應呢個MSG。三五日左右，BB就會正常番，唔駛擔心的！
若果你覺得好辛苦，試下飲多少少魚湯，食下紅豆，雞旦咁（我果陣係咁的），一飲就上奶，幾得架（係成煲咁飲呀但係，當水咁飲一兩日，但當然都要飲水啦）。上奶未必會谷奶架，只要你BB夠大食，佢食完又玩得食得就OK，個胸鬆唔代表無奶的。
你BB四星期大啫，仲好可能仍然係少食多餐型，唔駛忙唔駛擔心，佢胃仔得佢拳頭咁細，密密餵就OK！試下瞓喺度餵丫（若果怕責親佢，可以叫老公讓幾日半邊牀俾你瞓，你餵完佢放開佢去老公果邊空牀瞓就唔怕），會多D時間休息，又唔駛下下BB醒老公又無得瞓。
若果呢D方法都唔WORK，最大可能就係。。。你生左個聰明B，佢好識痴人，知道媽咪最正，成日啜啜啜住瞓。。。咁。。。無計架喇，你有無奶都無用，佢都係要痴實你。。。認命啦！用奶樽或者奶粉都唔會有用架喇！因為BB太醒。。。知道只要一啜，媽咪就走唔甩。。。解決方法得一個：抱多D佢，錫多D佢！ 到佢三四個月大左，夠哂安全感喇，咁你就可以行開少少。。。
不過試下CHECK密少少BB的尿片，有D BB好奄尖，真係一TUK尿或屎已經喊哂架喇，一換就會瞓得着。。。你知啦，人奶B又真係屙得密少少的。。。慳到奶粉錢，慳唔到尿片錢架，哈哈！若果佢係乾淨型BB，就要勤換，唔係？佢喊成粒鐘都唔會瞓！
BB喊一定有原因，但好多時同佢食唔食得飽未必有關的。。。所以唔駛擔心架！奶媽係餓唔死BB的，只要對正下藥，BB就會健康快樂架!