谷奶但BB不在身邊…

我個B出世的時間都係因為食咗奶咀唔肯啜我乳房，我同佢對峙咗2日，唔理佢咁多，佢喊都要佢試，咁最後佢咪又死死哋氣啜我的乳房，所以只要忍心D，係可以令BB變番埋身的。

我哋聽過有個CASE，有個媽媽一向都係泵出黎俾BB食的(又係因為BB食咗奶咀後唔肯埋身)，有日佢泵唔切，BB又好餓，咁佢咪唯有埋身俾佢食囉，個B又肯食喎(因為肚餓)，仲自此之後就變成埋身餵。

我唔係教你虐兒，只不過食奶係BB的本能，只要激發起佢肚餓要揾食D個基本需要，咁佢就會自然肯埋身食架啦。

由於你生咗幾日啫，D奶仲係由初乳慢慢轉化成成熟的奶當中，比較"杰"身係正常的(初乳會較黃較杰)，你可以飲多D水，等D奶的水份可以多D，或者會有改善。

至於通草，我本人覺得最好唔好試住啦，因為你依家谷緊奶，但係又出得唔好，如果再飲通草，咁咪仲多奶，到時咪仲谷....嗱我唔係E師，D個純為個人意見。

多謝你地既回覆，今日我試左幾次，每次都有好幾滴了~但係依家好谷，我本身唔飲奶既，如果只係用通草煲水，會唔會都好D呢??谷奶谷到好痛，我忍唔住食左PANADOL…

我想試下用樽儲起D奶，少少都好，但係只係可以滴到1ML去個奶樽度，因為D奶都好黏，黏住手指同埋乳頭，反而唔可以一滴滴落個樽度，呢D情況唔知幾時先可以改善呢?謝謝!

我 BB 出世嗰陣要留喺 "氧氣箱", 我去病房睇佢都要隔住個箱, 唔可以抱佢, 餵佢更加唔使講啦~ 到佢出世後 3日我出院, 但佢仍要留醫唔可以跟我返屋企.
同你個情況有啲相似, 就是當我出院後開始谷奶嗰陣 BB 唔喺身邊. 最初我泵 2, 3分鐘得幾滴, 唯有 keep 住每隔幾個鐘泵一次同埋打圈按摩乳房. 我唔知道其他媽媽嘅情況係點, 但記得陪月幫我用熱毛巾敷同按摩時, 我係痛到標眼水 ga! 個陪月話係咁痛 ga 喎, 仲叫我等佢按摩完先泵奶 (其實佢按摩時都差不多擠晒出嚟啦!), 佢話會啲奶會出得順啲! 夜晚陪月放咗工, 我自己實在唔可以忍住痛, 好似陪月咁大力咁按摩同擠奶, 所以我會用裝了熱水的奶樽來 "碌" 下 (同埋 keep 住泵), 會舒服啲! 我個 case 係痛咗 2, 3日左右, 之後都算ok!!
我覺得熱敷同按摩都有幫助 ga, 另外足夠嘅休息同心情開朗亦都十分重要!!
加油呀~ 開頭係辛苦少少, 但之後好快你個身體就會適應, 到時就冇咁痛 ga 喇!! 祝你 BB 早日出院返屋企啦~

Hi xenialam,

你現在開始上奶，乳房有硬塊(勁谷)的原因是奶水未能從乳房排清，日子久了便塞乳腺。當有乳腺炎，係就會發燒，所以要盡快去排清乳房內的奶水。

請先熱敷乳房，用手指掃乳房或按摩，再用手推開硬塊至出奶。記得要用任何方法自我鬆弛，如聽歌、閉目養神、深呼吸、喝杯溫暖的飲品、打電話給朋友等，越緊張就越難去推開硬塊。一次未必能成功，可以休息一會兒大約一小時，再嘗試，其間要休息及多飲暖水。

之外，手擠時嘗試使用你的五官及想像力。眼﹕看看孩子的照片，想像你和BB一起、都有助呀。

你現時情況係用手擠會比較好。但如果有電泵機，也可以嘗試，但力量唔可以太大。

如果都未能出奶，你可以去屋企附近的健康院預約，請教姑娘，佢地會好樂意幫你解決餵奶問題。

希望幫到你。 加油呀！！！

好開心，係餵奶的路上給我好多次唔同的機會，有單胎，有孖胎，有順利，有麻煩，有全埋身，有全泵，令我可以能體會到不同奶媽的辛酸。

第一胎，餵到囡囡三歲，在三歲生日那天自然離乳。第二胎係龍鳳胎，初頭５個月係一齊餵的全埋身，但返了工後，細孖唔要埋身，只好轉全泵，又係另一種的體驗。唔知第二胎可以餵到幾耐。

同大家一齊努力！！