BB已經一個多一星期大了，我仍不夠奶餵他，每餐均需補奶粉，幾時先可以全人奶呢?

科妮您好！

你有沒有帶BB 返健康院檢查？除了食上奶食品之外，BB 的吸吮時間較長，你帶BB 返健康院，檢查一下BB 的食奶姿態是否正確，例如嘴巴張得夠唔夠大？因為很多時BB 的吸奶姿勢唔正確，食奶時間稍長，會令媽媽以為自己唔夠奶。

你只要打電話去屋企附近的健康院預約就ok 的了，健康院網址。

哺乳圍巾，送禮自用皆宜，所有收益撥捐推廣母乳，歡迎選購。

Teresa 提到的食品, 原來我也有吃. 我坐月的時候, 早午晚餐連宵夜都有飯! 坐完月後, 午餐晚餐也大多是吃飯 (很少食麵食三文治等作正餐). 因為我不是烹飪能手, 所以一星期至少 3晚是蒸蛋/煎蛋卷, 另外間中也會到超市買已煮好的豬手加餸. 我還買了罐頭豆沙, 用來塗麵包再加些煉奶, 作為下午茶...
原來不知不覺間已經 "進補" 了!! 我剛請教過我的老師, 這邊的人流行用豬手/腳煲湯來增加奶水, 煲甚麼也可以... 跟 Teresa 說的一樣!
另外一個十分認同的 point, 要放鬆心情~ 加油!

同意KAY所講多埋身餵係最有效。。。若果你真係擔心，就辛苦少少，晚黑都起身埋身餵，因為晚黑係造奶高峰。
每個人嘅上奶程度係唔同嘅，有可能係你個BB大食D，你身體要多少少時間適應啫！放心，無聽過古今中外有阿媽會餓死BB架！一定夠餵嘅！！！
BB咁肯啜你，好快你就OK架喇，但若果每次都八十分鐘梗係辛苦啦，所以你應該晚黑都試下埋身餵，若果佢埋完身都未飽先加奶粉，咁就事半功倍喇！
慢慢上奶上得穩定，BB就食得開心，你又餵得放心架喇！
放鬆心情都好緊要啦！唔好擔心，越擔心越唔夠奶架！
多食上奶嘅野囉！每人都有唔同方法，我自己呢，就會以魚湯行先，‘梳蘿‘魚最有效（但要好多煲埋兩三碗果種，唔好煲大一煲淡淡咁），仲有木瓜魚尾湯，紅豆沙／粥，蓮藕，小米，雞旦，豆漿，花生雞腳湯，豬手（代替豬肉／骨放湯），大白飯！！！呢D都好上奶嘅！
我果陣唔食包架，因為一餓就食飯，想上奶D嘛。。。粉都唔食，食飯！
我唔知係心理作用定乜，總之你怕唔夠奶，你就試下最自己嘅DIET改到所有野都係上奶架啦，咁你一定OK架！
記住，人奶媽係唔易做，但無媽咪會無奶餓親BB嘅！只要有恒心，BB一定夠奶食！
努力，加油！

teresa

我覺得應該多點讓 BB 吸啜, 奶量就會自然增加, 這是最有效的方法.
起初我餵 BB 時也好像不夠奶, 餵了一整個小時他還是 "咀 lam lam" 的樣子. 到他滿 4週時 (可能踏入猛長期), 幾乎每小時都要吃, 有時吃不飽還會哭鬧起來. 後來得到這裡其他媽媽分享經驗, 最緊要是有信心, 當 BB 想吃時便抱起他餵, 不用擔心太多. 透過 BB 的吸啜, 你的身體知道了 BB 的需求便會自然分泌多點乳汁.
初生 BB 吃奶的技巧和力度可能比較弱, 所以你更加要埋身餵他, 讓他有多些機會練習, 之後餵奶時間便會大大縮短~
所以結論是: 不要補奶粉!

至於飲食方面, 要吸收足夠的碳水化合物, 另外聽說黑豆茶也有幫助... 不過我不在香港, 我這邊是沒有木瓜, 沒有黑豆, 也沒有適合煲湯的魚, 所以增奶的食品及產後補品我完全沒有吃過. 最初不夠奶, 捱了一個月瘋狂埋身餵之後便自然 OK 了~ 我覺得食品只是輔助, 最直接還是靠 BB!!

祝你早日可全人奶餵 BB!!