乳頭痛且乳房痕癢

agnes88,

1) 媽媽乳頭的大小同餵母乳的影響吾會太大.只要調校啱BB 食奶的姿勢,就吾會整痛/損媽媽乳頭喇!
2) 哺乳初期,媽媽乳頭損係幾普遍既狀況.正如初學游泳,十個著了九個會嗆鼻.只要協調到在水中呼吸換氣的動作節拍,咁就游好耐都吾會嗆親喇.但教游水既人比識教妳改善哺乳姿勢既人多好多好多咁啫.
要BB 個嘴張到喇叭咁,至好推佢埋身.如果發現BB 只係用嘴含住妳乳頭較前位置,而佢一路食,妳又一路痛既話,咁即係佢含得太淺(BB 用緊口腔前面硬骨部份壓/磨著媽媽的乳頭).就要撬鬆佢個口,再試過.
3) 因為乳頭損了,所以會痛,結了燋又會痕.不過,都要小心處理損了的部份,有時會係真菌感染架.
4) BB食得慢既原因,可能係佢實在用錯方法食奶,所以要食好耐至飽.另一個原因係BB 雖然食得飽飽地,但係響妳懷抱,佢覺得特別溫暖同有安全感,鍾意咁樣俾妳攬住.
5) 泵出來,確是能夠看到BB 食得幾多,兼且佢又會食得比埋身時較容易,所以好快食完奶瓶內既奶.但係咁細個人仔,一時要佢埋身,一時又俾個吾用力都食到奶既奶瓶佢.佢梗係鍾意個易食既方法.起初睇到BB 食幾多,似乎係幾好.但咁會容易令BB 有乳頭混淆,令佢抗拒埋身.到時想返轉頭教佢埋身食時,或會比現在更困難.

改善方法:
A) 向有經驗人士取經,多到健康院去見哺乳姑娘,請她們指導正確的哺乳姿勢.
B) 使用能保持表面乾爽既乳墊,用自己乳汁塗搽損了的位置.
C) 仍可持續埋身餵,但改換餵哺的姿勢,如: 攬球式, 瞓低餵.
D) 即使泵出奶水,為免BB 有乳頭混淆,可使用杯仔/匙羹/針筒餵BB食奶.而泵奶次數亦宜與BB每日食奶餐數一致,以確保有足夠奶水供給BB.

希望幫到妳啦!