You are here討論區 / 早產及0 - 2 個月寶寶 / 無奈的要放棄了......
無奈的要放棄了......
還有一個可以試的方法: 到買泵奶器的專門店,買一條好似叫"母乳吸管"的東西.
是一條好幼好幼的吸管,將之沿乳頭貼在乳房上,另一端放進奶瓶內,然後再讓BB埋身食奶.
BB一邊吸啜媽媽的乳房,同時又在吸到奶瓶的奶水,這就不致於因吃不到奶而發脾氣了.
當然,這個方法也是權宜之計,不是長久的辦法.但就可以同時訓練BB埋身食奶的技巧了,媽媽亦因為BB肯吸啜,刺激多了,奶水亦會隨之而多了.
餵多一次算一次,餵多一天算一天!加油! 
唔好放棄呀,我同你差唔多,剛出世既時候,因為BB面黃而搞到屋企人反對,我只能泵出嚟餵佢,後來到佢無黃既時候,我埋身餵咗佢2日,佢就入院,而我亦病咗,醫生仲話我食果隻藥係唔可以再餵人奶,於是我以為我要放棄了,當時真係好唔開心,覺得自己好無用,唔可以將最好既嘢比BB,我停咗2個幾星期,期間只係好谷好谷既時候先泵出嚟,但後來我打去醫院問,原來我食果隻藥根本就唔影響我餵人奶,於是我即刻埋身餵,但可惜已經好少奶喇,BB當然啜到發脾氣啦,一埋身餵就損,甚至流晒血添,好痛架,屋企人又開始反對,話係我無奶,BB先會咁喎,又話我咁樣會搞到BB唔好,於是我只係每日泵啲泵啲儲埋比佢食,乳頭好番又比佢啜,期間不停食多啲有營養既嘢,希望多啲奶,就咁樣BB已經2個月喇,去健康院打針既時候,姑娘再教我點樣餵,同埋鼓勵我,話我其實有好多奶,於是由果日開始,我返到屋企就全埋身餵,BB由每日一餐人奶突然改為每日一餐奶粉,到宜家已經2星期喇,多次因為乳頭痛到想放棄,但佢唔識啜係正常架,所以我更加要教識佢,雖然係一件好辛苦既事,但為咗BB,咩都係值得,我2個月先開始正式餵人奶都成功,我相信你都得架！我都係一個人湊,無人幫,甚至無人支持,但我都可以堅持,所以你都要信你自己,努力,加油,仲有,如果你真係想全人奶,就唔好補奶粉,補吓補吓你就會依賴架喇！
Nikitac多謝你!咁我想問如果泵奶每3小時一次，咁每次每邊要泵幾耐呀?
嗱，不如咁啦，我睇埋你的情況，會有以下建議，你自己決定試唔試啦：
1. 每次都埋身食奶先，繼續糾正BB 的嘴形，總之你係媽咪，BB 要聽你話㗎嘛，佢唔聽你就唔教，將來你點教佢認識呢個世界呢？遲下你仲要教佢去廁所，食糊仔食粥仔食生果，有好多野都要你去教BB 㗎。餵完母乳後，用奶樽蓋補奶粉，將BB 平時的飲奶安數減一半。
如果BB 個零兩個鐘就嘈，你抱佢五至十分鐘，如果都係再嘈咁就埋身餵奶，同樣，埋身餵完再補奶粉。
你試多幾日再睇下情況係點，記住母乳是越餵越多，只會有媽媽唔夠信心，唔會有媽媽唔夠奶。
另外如果係決心轉全泵，要keep 住每三小時泵一次奶，咁就會越來越多奶。
加油呀！
我都好想唔用奶樽餵，但問題係我唔用奶樽補奶粉，佢會唔飽。我都試過朝早只係埋身餵，但佢個零鐘就嘈，根本我就唔夠時間訓，休息唔夠都會影響奶量。
尋日同今日都冇俾囡囡食母乳，但係泵出O黎o既奶全日只係得80ml(尋日全日) & 90ml(今日全日)，咁點夠囡囡食??
我已經教過囡囡好多次唔好"O"咀食，但係次次等佢張大口之後佢就收番細。如是者教o左成個星期佢都係咁。
我真係覺得好辛苦，老公要返工冇人可以幫到我。囡囡又成晚都唔訓，佢真係朝早6點幾7點先肯訓，而晏晝訓又唔訓得"lump"，我連休息時間都唔夠，我都唔知點做。有時我自己都湊得好忟，所以我諗如果同佢轉奶粉我會好好多。
看完你的文章，深深感受到你很愛BB，由衷地希望給BB 最好的母乳，是個很偉大的媽媽！
魚湯在廣東地區是上奶湯水，其他地方例如台灣，媽媽生產完後是吃麻油雞補身及上奶，大陸的內陸地區，因缺少海鮮，會食雞蛋、豬肉等，所以上奶食品是各處鄉村各處例，食唔食好視乎個人習慣，就算唔飲魚湯都唔會無奶。
你的BB 剛出世，甚麼都不懂，現在最需要媽媽的愛心和耐心去教導，BB 唔識食奶，你慢慢去教，用手指拉開BB 的口，次次都糾正BB，BB 好聰明㗎，好快會學得識。我個仔就四歲，學新事物都唔係教一次就識，要日日講解先開始明白，教BB 都係一樣。
看你的形容，不是你的奶少，是BB 之前食慣奶樽，有乳頭混淆，所以埋身食會不耐煩，解決方法是不用奶樽餵奶，用已消毒的奶樽蓋餵，逐少逐少的倒入BB 口中，由於BB 天生喜歡吸吮的動作，一旦無奶樽可吮，會更喜歡吮媽媽的乳房。埋身餵時你赤裸上身，BB 只穿尿片，等BB 的手手腳腳和身體可貼著你的肌膚，媽媽的體溫有助穩定BB 的情緒，無咁易喊。
如果你覺得埋身餵令你好沮喪，還有一個方法，是我個人最後才建議的，你可以轉做全泵媽媽，日夜頻密的泵奶刺激身體造奶，這樣做你還可以繼續提供愛心媽媽奶比BB。待BB 三四個月大，吸吮技巧比以前更叻時，才教BB 埋身食奶，我見過不少全泵的媽媽，在BB 大個之後都仲可以成功地埋身餵。
育兒路不易行，找尋最合適自己和BB 的方法向前行最重要。希望幫到你吧。
盡了力便無悔, 不用說虧欠...
"Volunteers don't get paid, not because they're worthless, but because they're priceless!" - Sherry Anderson
捐款支持香港母乳育嬰協會
香港母乳育嬰協會乃本港註冊非牟利機構，推廣工作全賴公眾人士捐助及會員會費，請捐助我們，本會所簽發收據可用作退稅之用。詳情請看愛心捐助
免責聲明
本會並非專業資詢機構，僅為互助及推廣組織。鑑於本會職能，本網站內所提供的資訊僅應作為一般教育及參考用途，如有任何醫療問題或事故而引起的一切法律訴訟，本網站一概不負責。如果你有任何醫療問題，應向自己的醫生面對面查詢，而不應單倚賴本網站提供的資料。
由囡囡未出世時，我已經睇好多關於餵哺母乳的資料，為第日囡囡出世作好準備。但原來好多o野唔係我地可以控制到!
囡囡順產出世後3日，傷口爆了，先食了8日抗生素停止餵母乳，只維持泵奶，希望之後仲keep到有奶。聯針後因為不能下牀，停了兩日(連泵都泵都冇，因為坐都坐唔到)。兩日後再繼續埋身餵，但好少奶出，所以要補奶粉俾囡囡。之後個傷口埋得唔理想，要拆線再聯。聯o左又要卧牀一日，又再次停埋身及泵奶一日。夾夾埋埋，坐月時間已經過去。醫生及姑娘(連健康院洗傷口個姑娘)都話唔好飲魚湯，但唔飲魚湯邊有奶??結果我改用木瓜+排骨+通草，不過因為已經成個月過去，作用都不大。而家差唔多兩個月，但因為我個傷口要自行癒合，到而家為止都唔飲得魚湯。
當第三次聯針拆線之後，第一時間上去健康院搵姑娘教囡囡食母乳。唔知點解，有姑娘睇住食就好地地，但一番屋企食就唔肯再張開口食，只係好似"O"形咀咁食，咁食當然出奶出得唔好。不過佢係都唔肯張大口，我都冇辦法。
而近日囡囡一埋身食就好忟，因為可能我奶少，又流得慢，佢好冇耐性食。一啜唔到就扯番出o黎，好多時只係食到前乳食唔到後乳。其實囡囡好鍾意食母乳，因為一俾佢用奶樽，佢就會依依哦哦咁鬧人。
尋日同老公商量之後，不如俾奶粉佢食，因為唔想佢因為食唔到母乳而乜都唔食。唔俾佢揀可能仲好d。
雖然我都知母乳係對囡囡最好，但我真係盡晒我所有能力。我覺得有少少虧欠囡囡，點解連呢少少o野我都做唔到? 不過我相信，囡囡會知道我已經俾到最好佢，因為我都曾經俾過差唔多兩個月母乳佢(雖然唔係全母乳)。
好多謝某討論區post o左呢個網頁出o黎，因為呢個網頁真係解答o左我好多餵哺時o既問題，奈何我真係盡晒力......不過真係好多謝呢個網站o既幹事同其他媽媽分享! 希望各位媽媽能夠繼續俾最好o既o野俾你地o既bb，等佢地可以健健康康咁成長!!