BB 出世後一直全人奶, 不經不覺餵左 13個月.
1) BB 夜睡不寧, 每天清晨便起床
BB 11個月大時, 我幫佢戒左夜奶希望改善佢睡眠質素. 一星期已經叫做成功左, 佢半夜冇再起身, 一覺瞓到約 5點左右, 我會餵佢之後佢又會再瞓到約 7點. 可惜只係開心左 2個月, BB 滿一歲後又突然半夜起身 3, 4次, 而且一醒就爬起身大喊, 我都唔知點解... 而且佢每朝 5點就起身, 唔肯再瞓~ (佢日間午睡約2小時, 冇改變) 我見佢慢慢開始有黑眼圈, 雖然好擔心 BB, 但自己可能因為太累而很容易發脾氣, 亦冇心情同精神陪 BB 玩.
2) BB 唔識 (唔肯?) 咀嚼
BB 5個月大就出左2隻門牙, 最近出緊犬齒, 雖然牙仔唔少但似乎唔願意用. 俾佢食麵包, 多士, 零食餅佢都好鍾意, 但水果只肯食較軟的, 如香蕉, 士多啤梨及水蜜桃. 蘋果及雪梨等佢會咬到一粒粒吐晒出嚟, 若做果蓉俾佢會嘔. 正餐菜肉都鍾意食, 每次食晒成碗粥. 但若當中的菜切得較大粒, 佢會伸手指入口撩返出嚟!
見我食飯佢好有興趣, 若餵飯佢係就咁吞, 唔咬的! 點解會咁ga?
3) BB 唔肯飲野
除左直接餵人奶之外, 水, 果汁, 淡茶, 鮮奶等全部唔飲! 最初教佢用鴨咀學習杯同飲管杯時, 佢好鍾意飲. 但約一個月後, 可能佢學識就冇新鮮感, 每次遞俾佢只飲2啖, 再遞俾佢會照樣吸啜之後吐出嚟, 整到自己同地下都濕晒~
之前由於我要讀書, BB 8個月大開始返托兒所. 因為我一直埋身餵, 所以 BB 唔肯食奶樽 (我 pump 出嚟的人奶), 每次老師攞奶樽俾佢就大叫大喊同埋發脾氣, 用其他方法餵 (例如用杯飲或遂匙餵) 亦食得好少. 當時老師同我商量後, 大家都認為 BB 食固體食得好好, 就決定唔迫 BB 食奶, 即係由朝早 9點至下午 3, 4點佢都冇奶食. 唔知係咪因為少左餐奶, 所以佢半年只高得1, 2cm. 而家我想加一餐鮮奶或偏食配方奶俾 BB, 但佢十分抗拒. 可以點樣氹佢飲野呢?
我明白 BB 身高同生長速度主要係遺傳影響, 但當好多人都質疑母乳唔夠營養俾 BB 時, 我真係覺得好煩惱, 希望 BB 快高長大, 果D人快D收聲...