BB 啱啱滿 5個月大, 之前都未病過 (除咗出世時有氣胸之外)
星期日中午幫 BB 沖涼之前探熱都仲係 36.3度. 嗰日佢食完晏晝餐奶之後就瞓咗, 點知半個鐘就突然醒咗喺度喊, 我去抱佢時發現佢好熱, 一度原來 38.5度呀! 我即刻帶佢去醫院, 等見醫生時食咗退燒藥. 之後又照肺 (呢度個個睇急症嘅小朋友都要照), 醫生睇過佢耳仔, 喉嚨, 聽過肚仔都一切正常... 唉~ 都唔知點解咁突然會發燒. 醫生估計多數係感冒喎~ 所以開咗感冒藥俾我, 佢話若果 BB 兩日後都唔退燒就返去驗尿驗血. 我問醫生會唔會因為 BB 出牙而發燒 (就係星期日喇! 當日開始見到白色牙仔喇~) 醫生話唔關事架喎 =.=!
當晚返到屋企 BB 已經退咗燒, 但都仲有 37.4度, 比平時高... 所以臨瞓前我就餵咗佢食醫生開嗰啲退燒同感冒藥, 星期一朝早 (雖然體溫已屬正常 36.4度) 再餵咗一次. 之後我老公話 BB 又冇其他病徵, 又已經退燒, 叫我唔好再餵藥. 停咗藥之後, 直至今日下午體溫都係 36點幾, 但頭先黃昏時又突然升高到 37.2度... 好驚~ 我又唔知 BB 咩事, 到底係咪感冒呢? 係咪應該餵晒醫生開嘅3日藥呀?
補充: BB 食得瞓得, 大小便都同平時差唔多. 係好似攰攰哋, 但撩佢都肯玩~