‬ 媽媽分享

[B計劃之媽媽分享] Winnie Mama（空姐）除了參與昨天港台「思潮作動」分享經驗外(重温：http://bit.ly/1HuVMZC)，亦寫了一些鼓勵說話給大家：

我係一位空姐媽媽，餵哺母乳17個月（仍在哺乳），囝囝6個月後復工，最初返工都以為會好難維持，自己一路諗，希望餵到幾耐得幾耐啦，完全唔知飛緊時點處理啲奶，同點樣泵奶，於是我周圍問同事，發現原來身邊都有好多同事餵奶，教我好多處理方法，我先可以維持到而家！

當中都有困難，好似無時間泵，因為機上太忙，而且亦沒有一個位置可以泵奶，除左長途機可以在機員休息室泵，其他地方就係廁所，但為左維持奶量有時候都要被迫係機上廁所泵，最後由於衛生問題，泵出黎既奶都冇要到！

去到外地泵奶，有時酒店房間雪櫃唔夠凍，要落去問酒店員工幫忙雪奶！ 雖然有好多難關，但幸好身邊既家人同事都好支持，我先可以順利持續餵哺！

想帶一個message 比所有在職媽媽，好多人以為返左工，就好難維持，無時間，無地方泵奶係一個重點，但其實只要自己勇敢前行，同公司講你的需要，同同事解釋清楚，相信好多人會明白同支持！唔好咁易受其他人影響！要相信自己同BB!

餵哺母乳係一件非常正常既事，係同BB最親密既接觸，只有媽媽先可以做到同俾到BB最好既野！希望社會更加多人會明白, 同支持！得到更多餵哺既知識！媽媽加油！

[B計劃之媽媽分享] Ivy Mama (文職-人事部）：回想起9個月前，產假後正準備返回工作崗位，囡囡4個月⋯一直全埋身，feed on demand，忽然要安排一個餵奶時間表，的確有點頭痛，又要擔心返到公司點泵奶⋯幾時泵奶、泵幾多次、要帶什麼工具、運送方法等⋯

終於開工，老闆同事都好支持，加上公司提供一間nursery room，比起好多奶媽，我算是十分好彩同順利，又有一班泵奶媽媽一邊泵一邊互相分享，鼓勵及支持。Lunch time泵一次，4點泵一次，8點前仆到返屋企埋身。

一日又一日，每日什麼也不理，一夠鐘收工就極速返屋企趕埋身，好攰，但好滿足，雖然每日有12-13個鐘不在家，但囡囡仍然可以全人奶，而且亦好喜歡攬埋我度啜，好sweet...

有時候的確會覺得自己為咗做個奶媽，放棄咗好多⋯lunch time泵奶，好偶然才可以與同事食lunch，工作時間，又抽了半個鐘去泵奶，多少有d壓力，而且放工一袋二袋，又泵又冰袋又奶，都幾論盡⋯不過其實有時揸住自己支奶，都幾自豪！看到自己的堅持，看到自己對囡囡的愛！

囡囡宜家已13個月，主餐是固體，其餘時間依然全人奶⋯泵奶壓力沒有了，也不用趕回家埋身⋯但囡囡仍很愛（我也很愛）早晚埋身，那是我人生最溫馨最動人的時光～