空姐

[B計劃之媽媽分享] Shannix Mama（空姐）：我係一個在飛機上工作既在職媽媽，亦係一個新手媽媽，我剛剛響我仔仔踏入15個月人仔既時候(自然地)完成左全母乳餵哺呢個既艱辛又帶比我好大成功感既所謂「媽媽的偉大任務」。

幸運的是，我任職既航空公司是一間廉航，大多的航班都是即日來回，相比起飛長途機既母乳媽媽們幸運得多，還記得工作既日子，我每次返工都必定帶齊奶泵、奶樽、儲奶袋、餵奶巾同一個內置雪種既冰袋。 至於雪奶既冰種，我就會用上飛機既乾冰。

同一般上辦公室工作的媽媽們作比較，我泵奶真係好特別好有特色，就係響飛機上既廚房"Gallery" 作為泵奶房，Gallery 其實無遮無掩，全靠一條餵奶巾，我就可以好輕易地泵奶，真正既一巾走天涯！

至於放假既日子，我就會全埋身，目的就係希望保持奶源充足，刺激上奶，除左每日日頭餵奶之外，凌晨時分仔仔每逢點半，三點三，五點半都一定會喊住要食奶，仲要食到八個半月，有時候返完工真係好攰，但心諗為左個仔健康，點都合住眼爬起身頂硬上，其實只要夠決心堅持住，在職媽媽們都可以繼續人奶之路。

回想呢15個月，真正感受到餵哺母乳既不簡單，期望母乳餵哺可以更普及，所有小BB都可以嘗到人間極品，健健康康！

母乳媽媽們，努力！

[B計劃之媽媽分享] Winnie Mama（空姐）除了參與昨天港台「思潮作動」分享經驗外(重温：http://bit.ly/1HuVMZC)，亦寫了一些鼓勵說話給大家：

我係一位空姐媽媽，餵哺母乳17個月（仍在哺乳），囝囝6個月後復工，最初返工都以為會好難維持，自己一路諗，希望餵到幾耐得幾耐啦，完全唔知飛緊時點處理啲奶，同點樣泵奶，於是我周圍問同事，發現原來身邊都有好多同事餵奶，教我好多處理方法，我先可以維持到而家！

當中都有困難，好似無時間泵，因為機上太忙，而且亦沒有一個位置可以泵奶，除左長途機可以在機員休息室泵，其他地方就係廁所，但為左維持奶量有時候都要被迫係機上廁所泵，最後由於衛生問題，泵出黎既奶都冇要到！

去到外地泵奶，有時酒店房間雪櫃唔夠凍，要落去問酒店員工幫忙雪奶！ 雖然有好多難關，但幸好身邊既家人同事都好支持，我先可以順利持續餵哺！

想帶一個message 比所有在職媽媽，好多人以為返左工，就好難維持，無時間，無地方泵奶係一個重點，但其實只要自己勇敢前行，同公司講你的需要，同同事解釋清楚，相信好多人會明白同支持！唔好咁易受其他人影響！要相信自己同BB!

餵哺母乳係一件非常正常既事，係同BB最親密既接觸，只有媽媽先可以做到同俾到BB最好既野！希望社會更加多人會明白, 同支持！得到更多餵哺既知識！媽媽加油！

[B計劃之媽媽分享] Jo Jo Mama (空姐): 由懷孕開始，我已經知道母乳對BB的重要，而我亦下定決心做個全母乳餵哺的媽媽，還記得BB出世之後吸吮第一啖母乳的一刻，真的好感動，母乳餵哺的確不是易事，尤其對在職媽媽來説，更是難上加難！

由於需要在機艙工作，而且沒有休息時間，第一天上班個胸已變石頭乳，幸好無塞同發炎，之後每次泵奶都要偷偷地衝入厠所，無錯係廁所，空姐媽媽只可以在細小狹窄骯髒的廁所裡泵奶，而且無特定時間，如果full load的話，可以五六個鐘之後先泵一陣，起初真係好想放棄，因為要成日忍受胸脹，但又無時間泵，而且套制服又窄，胸脹的時候真係好難受，但每次見到個仔食媽媽奶之後個滿足樣，我又同自己講一定要捱過去，因為BB健康好重要，宜家BB十五個月大，我仍堅持母乳餵哺！只希望公司可以支持母乳哺育的員工，提供泵奶時間和優質的泵奶環境！