母乳媽媽：飲贈品都飲唔晒

列印版本

摘自蘋果日報

【無孔不入】
奶粉商宣傳無孔不入，除洗腦式廣告硬銷歪理，更成立「媽咪會」或「BB會」，以贈品攻勢吸引媽媽入會，掌握嬰幼兒資料作階段性推銷。有家長透露，由懷孕開始媽咪會已不斷送禮品，部份更「大手筆」整罐奶粉送贈試飲，至今收到奶粉20罐之多。

方太育有一名4歲女兒及一對9個月大龍鳳胎，兩次懷孕都有加入幾個不同奶粉商成立的媽咪會。她指出，各品牌的媽咪會網絡強大，職員會從四面八方招收會員，「醫院門口會有嬸嬸叫你入會，私家診所亦有申請表由護士幫你入會」，入會後定期會有禮品送贈，主要為孕婦及嬰兒用品，「有時會寄上門，甚至速遞到你屋企，當然中間夾有產品宣傳資料」。

由懷孕至現時龍鳳胎9個月大，方太從媽咪會收到的贈品堆滿一屋，由口水肩、紗巾、手套、衫褲、BB包被以至玩具包羅萬有，而供試飲的奶粉更會整罐送贈，「臨生一個月會寄畀你，到BB五個月大差唔多轉奶粉又寄畀你，時間計到啱啱好，孖胎寄兩份，次次都兩罐兩罐寄嚟」。不過，方太堅持餵哺母乳，奶粉只是補充用途，她從未為子女買過奶粉，「飲贈品都飲唔晒」。

定期電話跟進推銷
至於媽咪會最強攻勢，是職員定期電話跟進。「幾個星期會打一次嚟，問吓BB情況點，餵奶餵成點」，但最終話題一定會回到自家產品身上，企圖為媽媽洗腦，「例如我講明餵緊母乳，佢都會話補啲奶粉先夠營養」。當局計劃限制奶粉商成立媽咪會等，方太表示支持，「奶粉賣到二百幾蚊罐，其中成本一定包括媽咪會啲贈品，不如cut晒所有嘢減奶粉價格仲實際」。

[此乃參考之作用]